Baixará a Igrexa á area?

Recibo do amigo Xaquín Campo Freire a mensaxe que presento e encolo aquí, coa que, por suposto, cadro talmente conforme. A Igrexa, desde o século XV, estivo case sempre do lado dos perseguidores ou ocultadores da nosa lingua e cultura. As veces que axiu doutro xeito, fíxoo tan tímida, covarde e inconsecuentemente...! Mentireiramente, case estou por dicir! Que vai facer agora, cando a situación é crítica?

Encolo a mensaxe de Xaquín:

VALE MÁIS ACENDER UNHA PEQUENA LUZ QUE MALDICIR AS TEBRAS

Fronte á campaña de destrución da nosa querida lingua e cultura, eu quero ir acendendo pequenas luces. Velaí un cartaz apropiado para as nosas igrexas. Non llo copiamos a ninguén. O orixinal é de Tori. Conviría darlle cores axeitadas. Os nenos saben facelo moi ben. Pódense facer fotocopias e repartilo na catequese para que lle dean cor e logo faise unha catequese de como Deus tamén apousa connosco:

"É domingo, día de festa, día do Señor, e El fala coma nós. Mellor: Nós falamos coma El, GALEGO. O GALEGO TAMÉN VOS É COUSA DE DEUS. A PALABRA DE DEUS TAMÉN ACONTECE EN LINGUA GALEGA. LOADO SEXA DEUS. Ten algo que ver o de GALILEO? Tampouco de alí podía saír cousa boa, disque!

Non teremos que render contas de ter cooperado desde a Igrexa cos destrutores do de nós? Non somos nós mesmos deses perseguidores? O Concilio Pastoral de Galicia di así:

"11.1.- O C.P.G. pídelle a todos os cristiáns, Bispos, Curas e Leigos, cadaquén según a súa especifica misión,que participen na promoción da lingua galega,por ser un valor humán que está asociado coa liberación do home galego e, por ende, coa evanxelización."

Os do Concilio Galego non eran ningúns tolos nin "políticos", nin estremosos. Se de algo pecaban era de seren excesivamente conservadores e abondo timoratos. Como Igrexa de hogano, estámolo a facer? O Bispo Araúxo cumpriu:

"A FE CRISTIÁ ANTE A CUESTIÓN DA LINGUA GALEGA".

E sufriu persecución política, e tamén desde dentro da Igrexa e dos eclesiásticos. Podo testemuñalo persoalmente. Era maio, Festa da Pentecoste do 1975. Pero era crente e por iso falou e falou palabras de vida. Acendeu a súa luz. E o seu brillo segue aí coma un facho ben esplendoroso. Benia á súa teoloxía e ao o seu compromiso de home de Deus.

"Vós sondes a luz do mundo. Vós sondes o sal da terra"

VALE MÁIS ACENDER UNHA PEQUENA LUZ QUE MALDICIR AS TEBRAS