Transcríbese a seguir un comentario, publicado onte en xornal.com, referente a unhas declaracións da presidenta do parlamento galego, nas que, entre outras ideas, se expresaba estas dúas: a) a xente nova galega emprega maioritariamente o castelán, non o galego, e por algo será -engade-; b) o bipartito fíxolle moito dano ao galego, mediante a súa imposición, enténdese.
Co comentario que se transcribe, este blogueiro está totalmente de acordo. Aínda que habería que arrequecer a relación de causas polas que a mocidade galega fala agora maioritariamente en castelán. Os que temos máis anos e levamos feitos, durante xa case medio século, análises e proxectos referentes á situación lingüística e cultural deste país, sabemos moito máis desa realidade do que poida saber unha xeración esnobe que irrompeu ultimamente na sociedade cunha superficialidade directamente proporcional ao poder acadado de resultas do xogo da democracia.
Por algo será...? Pois claro!
Tucho
2009-08-09 16:14:05
Cando di "Por algo será", que busca ou quere dicir? Busca causas, sinala culpas? As causas son múltiples. E as culpas vanlles anexas. Entre aquelas, velaí as tres máis importantes, polo menos se pensamos nos últimos trinta anos. Unha é política lingüística seguida neses anos: tímida, mentida, contraria ao espírito e mesmo á letra da Lei de Normalización... Outra causa, favorecida máis ca contrarrestada pola causa anterior: o incremento da presenza do castelán en Galicia nesas tres décadas a través de medios de comunicación social, produtos da cultura de masas, ámbitos de lecer..., fronte a unha diminución da presenza do galego en todos eses e moitos outros ámbitos. Terceira causa de que os mozos falen cada vez máis castelán e menos galego: a familia, a escola e outros ámbitos onde o neno se forma e socializa lingüísticamente. Por unha banda, os pais e avós que aínda falan galego entre si, na maioría desertaron de o faceren cos seus fillos e netos. No caso da minoría que non desertou, os rapaces pásanse ao castelán como lingua principal de relación fóra da casa, e isto sucede por influencia do ambiente escolar -inmersión en castelán, contra todo o que se diga- e noutros ámbitos onde os rapaces se forman e socializan -igrexas, clubes, grupos de iguais... O que nos quere dar a entender a Sra. Rojo semella ser ben diferente. Coma se a xente nova entendese mellor o que lles convén e o escollesen natural e libremente. Grande erro! As causas non as hai que buscar neles, senón nos adultos e ámbitos sociais responsables da súa socialización. Se se oculta isto e se suxire outra cousa, mal nos seguirá indo. Mentres as causas verdadeiras non se recoñezan, pouca esperanza hai de poder acorrer aos males causados polo proceso de demonización do galego e da súa masiva substitución polo castelán. Outra cousa que habería que notar, é que o bipartito non impuxo o galego. Aínda que quixese, non podería. Non tivo tempo. O decreto que agora se quere derrogar, saíu hai agora dous anos xustos. Sería extraordinario que en ano e medio fixese ese grave dano que o PP di.
Sem comentários:
Enviar um comentário